O porto de Burela acollerá un espectacular ronqueo de peixe espada na XX edición de Expomar
A vila de Burela prepárase para converterse, unha vez máis, no epicentro do sector pesqueiro coa celebración da vixésima edición de Expomar, que terá lugar do 7 ao 10 de maio. Nesta ocasión tan especial, a feira amplía horizontes, abríndose a sectores emerxentes como o turismo mariñeiro e as tecnoloxías innovadoras, sen esquecer a súa crecente aposta pola gastronomía vinculada ao mar.
Un dos momentos máis esperados terá lugar o sábado 10 de maio ao mediodía, cando se realizará un impresionante ronqueo dun peixe espada de máis de 100 quilos. A actividade, patrocinada por Interfish-España en colaboración coa Organización de Produtores Pesqueiros (OPP) do Porto de Burela, busca poñer en valor a calidade do produto e promover prácticas de pesca sostible.
A posta en escena correrá a cargo dos profesionais de Matrice Tuna, que mostrarán a técnica precisa e coidadosa do despezamento, combinando mestría, respecto polo produto e compromiso ambiental. Trátase da mesma exhibición que xa impresionou nas feiras Conxemar de Vigo e o Salón Gourmets de Madrid.
Ao rematar o ronqueo, os asistentes poderán gozar dunha degustación de receitas elaboradas con peixe espada, preparadas pola OPP do Porto de Burela. Esta entidade forma parte de Interfish, a única interprofesional pesqueira existente en España, que integra empresas da produción, comercialización e industria, cun obxectivo común: a defensa das especies de palangre de superficie, como a tintorera, o marraxo ou o propio peixe espada.
Expomar 2025 confirma así o seu papel como espazo de referencia para o diálogo entre tradición e innovación no mundo do mar.