O Pedro Murias de Ribadeo acolle un curso sobre transporte de animais
![transporte animal cerdos camion](https://amarinaxa.com/wp-content/uploads/2021/07/transporte-animal-cerdos-camion.jpg)
O Centro de Formación e Experimentación Agroforestal Pedro Murias de Ribadeo acolle o vindeiro martes 3 de agosto un curso sobre benestar animal no transporte.
Contará cunha duración total de 20 horas, en horario de 16:00 a 21:00 ao longo de 4 días.
O programa do curso está dividido en dous módulos, un xeral de 10 horas e outro específico doutras 10. No módulo xeral desenvolveranse temas como a lexislación do benestar animal, a anatomía, a fisioloxía e o comportamento animal ou aspectos relacionados directamente co benestar animal.
Pola outra banda, no módulo específico trataranse outros conceptos máis concretos como a lexislación específica de protección de animais no transporte, a documentación necesaria para o desprazamento de animais, as prácticas a levar a cabo no transporte ou a súa repercusión na calidade da carne.
Así, esta formación ten como obxectivo ofrecer aos alumnos os coñecementos necesarios neste eido para que poidan desenvolver debidamente todas as tarefas relacionadas co transporte de animais, dende dar de alta un remolque, desprazar animais ou xestionar os Sandach (Subprodutos Animais Non Destinados Ao Consumo Humano) ata resolver calquera imprevisto que teña lugar durante esta práctica.
Os interesados en participar nesta acción formativa deberán cubrir o correspondente formulario de solicitude que poden atopar no seguinte enlace: https://ovmediorural.xunta.gal/gl/consultas-publicas/accions-formativas e remitilo por correo electrónico ao enderezo: sheila.garcia.freitas@xunta.gal. Para máis información, poden chamar ao teléfono 982 82 85 50.