O peche de Sargadelos en Cervo deixa á Mariña sen un dos seus grandes emblemas
A decisión de pechar a fábrica de Sargadelos en Cervo caeu como un xerro de auga fría na Mariña lucense. A firma, que representa unha icona da tradición artesanal galega, anuncia o cesamento da súa actividade alegando dificultades para resolver en prazo as deficiencias detectadas pola Inspección de Traballo. A decisión do administrador único, Segismundo García, apaga unha parte fundamental do legado cultural e industrial da zona.
Nun escrito enviado á Inspección de Traballo, García xustifica a súa determinación pola imposibilidade de solucionar as incidencias dentro dos prazos esixidos, asegurando que "o fundamental, a saúde dos operarios, xa está protexida dentro das posibilidades da empresa desde hoxe mesmo". Con todo, para moitos, este argumento soa a escusa para botar o peche a unha fábrica que, malia as dificultades administrativas, se mantiña como referente do sector e cunha situación económica estable.
O peche de Sargadelos en Cervo non é só unha cuestión laboral, senón que supón a perda dun símbolo de identidade para Galicia. Fundada no século XIX e recuperada a mediados do século XX por Isaac Díaz Pardo, a marca consolidouse como un dos máximos expoñentes da arte e da cultura galega, sendo recoñecida internacionalmente polo seu deseño e a súa calidade.
A propia empresa recoñece as dificultades burocráticas derivadas da condición das súas instalacións como Ben de Interese Cultural, que esixe autorizacións especiais para calquera obra ou reforma. No entanto, este tipo de trámites son habituais para calquera industria patrimonial e, lonxe de servir como xustificación para o peche, deberían afrontarse con vontade de diálogo e busca de solucións.
A sorpresa entre os traballadores e veciños son evidentes, especialmente porque a fábrica atravesaba un bo momento económico desde a chegada de García á súa dirección.
O impacto non se limita ao ámbito laboral. Sargadelos é parte do ADN da Mariña lucense, un motor económico, un atractivo turístico e un sinal de identidade para Galicia. O seu peche representa unha perda irreparable para o patrimonio industrial e cultural da comarca.