O padrón de habitantes de Viveiro aumentou en 116 veciños
O padrón de habitantes do Concello de Viveiro experimentou un incremento poboación no que vai de ano, cun total de 116 veciños máis con respecto ao 1 de xaneiro de 2020.
A poboación do municipio a primeiros de ano era de 15.511; nestes meses, producíronse 287 baixas e 403 altas, resultando un total de 15.627 persoas empadroadas actualmente.
Das 403 altas rexistradas, 52 corresponden a nacementos; 281, a cambios de residencia dende outro municipio; e 57, a cambios de residencia dende o extranxeiro.
Dende o equipo de goberno valórase positivamente este dato e agárdase que esta tendencia se manteña, tendo en conta, sobre todo, que Viveiro é un municipio no que adoitan residir moitas persoas que figuran empadroadas nos concellos limítrofes ou da comarca, polo que a poboación real de Viveiro é superior ás cifras que figuran no padrón de habitantes.
Neste sentido, o equipo de goberno engade que “sería bo que todos as persoas que residen e fan vida aquí, se animasen a empadroarse tamén en Viveiro”.