O Osa do Mar de Burela fai un 'crowdfunding' para organizar a oitava edición
![osa do mar logotipo blanco](https://amarinaxa.com/wp-content/uploads/2022/01/osa-do-mar-logotipo-blanco.jpg)
O Osa do Mar de Burela anunciou que están a facer unha captación de fondos para poder organizar a vindeira edición do festival burelao.
"Pensamos en facer o Osa do Mar 2022 no metaverso e con hologramas para axustar o presuposto pero ao final decidimos intentar facer un festival dos de contacto. E para iso necesitamos da vosa axuda", dixeron dende a organización.
O obxectivo de esta campaña é xuntar entre todas e todos 3.000€ que se destinarán a pagar parte das bandas que tocarán en esta edición. "Recurrimos a esta campaña de captación de fondos vendendo por adiantado a entrada, camiseta e bolso para poder contar con uns fondos por adiantado que xa precisamos", engadiron.
Así, para participar na creación da oitava edición do festival existen tres tipos de achegas, a primeira, un Bono para os 2 días do Osa do Mar 2022, que consiste na entrada ao recinto os días do festival.
A segunda achega será a da camiseta do Osa do Mar, e o terceiro, un bolso de tela parecido aos que se fixeron en edicións anteriores.
"Elixe o pack que mellor se adapte a ti", din dende Osa do Mar, "tamén temos unha moi boa oferta, o pack Duosa, para as parexas ou amigos que queiran mercar ao mesmo tempo".
Así mesmo, xa está confirmada a data do festival para este ano e será a fin de semana do 2 e 3 de setembro en Burela.