O Observatorio da eólica mariña avanza na súa constitución de grupo social
A directora xeral de Planificación Enerxética e Recursos Naturais, Paula Uría, participou xunto con representantes das consellerías do Mar e de Medio Ambiente, Territorio e Vivenda, nun novo encontro do Observatorio da eólica mariña no que quedou constituído o terceiro grupo de traballo, que se centrará no impacto social que pode supoñer a implantación de parques eólicos mariños na costa galega.
Forman parte deste grupo de traballo os diferentes axentes sociais cos que se avaliará a proposta de zonas dos Plans de Ordenamento do Espazo Mariño (POEM) -a falta de coñecer o documento definitivo por parte do Goberno central- e buscar a súa integración nos obxectivos ecolóxicos, económicos e sociais. Súmase aos grupos de planificación e normativa e mais de tecnoloxía e innovación xa activados.
Deste xeito, o Observatorio continúa avanzando no seu labor de identificar oportunidades e analizar como pode afectar ao contorno e ás actividades marítimo-pesqueiras, fundamentalmente, a instalación deste tipo de parques eólicos.
Neste sentido, o encontro serviu para seguir fortalecendo tanto a colaboración como o diálogo entre todos os axentes implicados baixo o compromiso de que calquera proxecto que se aprobe terá que ser compatible coas actividades existentes e respectar a protección tanto do medio ambiente como das costas galegas.