O Museo Provincial do Mar de San Cibrao conta cunha variada programación de actividades para nenos
![Cervo museo mar 2022](https://amarinaxa.com/wp-content/uploads/2022/12/Cervo-museo-mar-2022.jpg)
O Museo Provincial do Mar de San Cibrao conta cunha variada programación de actividades destinadas a nenas e nenos de 4 a 14 anos. As propostas que pretenden axudar á conciliación, desenvólvense en horario de 11.30 a 13.30 e son de acceso libre e gratuíto, debendo inscribirse no correo concertacionsrmp@gmail.com
A semana pasada os participantes coñeceron canto nos contan os sons. Esta semana, a proposta para o mércores, 19 de xullo, é Ollos que escoitan. Escudos, logos, pictogramas ou emoticonas son imaxes que hoxe en día seguimos usando para comunicarnos. Seremos quen de conseguir que os nosos debuxos falen?
Xa o 26 de xullo terá lugar o obradoiro, Bandeiras que falan. No mundo da navegación, as bandeiras seguen sendo un importante medio de transmisión de información, cun código recoñecido internacionalmente, descrifraremos as súas mensaxes.
Ademais dos obradoiros que se seguirán desenvolvendo todos os mércores de agosto, o Museo Provincial do Mar acolle os martes ás 12.00 Fontaneando, para achegarse ao territorio desde o mapa de Fontán.
A área de cultura da Deputación Provincial de Lugo organiza a través da RMPL (Rede Museísta Provincial de Lugo) a programación de verán dos diferentes museos da Rede.