O Ministerio de Agricultura abre a pesqueira da cabala para a flota de Lugo e Asturias
O Ministerio de Agricultura, Pesca e Alimentación vén de abrir a pesqueira da cabala para a flota distinta ao arrastre e ao cerco de Asturias e Lugo, segundo recollen dúas resolucións publicadas no Boletín Oficial do Estado.
Estes documentos establecen o inicio da pesca desta especie cunha cota de 1.266 toneladas para o Principado de Asturias e de 494 toneladas para a provincia de Lugo. Como novidade, e tras analizar o consumo das últimas campañas, permitirase o acceso á pesca dirixida a todos os buques de artes menores, rasco, volanta e palangre de fondo no Cantábrico e Noroeste que teñan porto base en ambos territorios. Esta medida permitirá que un maior número de barcos poidan beneficiarse da campaña.
En total, poderán participar 277 buques de artes menores, 12 volanteros, 26 palangreiros de fondo e 2 rasqueiros de Asturias e Lugo. Por agora, non se considera necesario establecer límites de captura.
Esta actividade resulta esencial para a viabilidade socioeconómica da flota que opera con outras artes distintas ao arrastre e ao cerco no caladoiro Cantábrico e Noroeste, contribuíndo ao abastecemento dun peixe de tempada moi apreciado polos consumidores.
A Secretaría Xeral de Pesca realizará un seguimento da campaña para, no caso de ser necesario, aplicar as medidas de xestión oportunas e garantir o aproveitamento óptimo da cota establecida.