O mercado semanal de Viveiro trasládase en agosto aos Xardíns Noriega Varela
O Concello de Viveiro vén de anunciar cambios temporais na celebración do seu mercado semanal con motivo da programación estival. Durante o mes de agosto, os postos que habitualmente se instalan na Praza Maior trasladaranse de forma provisional aos Xardíns Noriega Varela.
Esta medida responde á necesidade de reorganizar os espazos públicos durante a tempada alta e facilitar o desenvolvemento das diferentes actividades culturais e festivas previstas. Dende o consistorio explican que a nova localización garante a continuidade do mercado mantendo a súa esencia e accesibilidade.
Ademais, e coincidindo coa celebración das tradicionais Festas de San Roque, o mercado que correspondería ao xoves 14 de agosto adiantarase un día, polo que terá lugar o mércores 13. Esta modificación busca evitar solapamentos coas actividades festivas e asegurar unha mellor organización tanto para os vendedores coma para os asistentes.
O goberno local agradece a comprensión da veciñanza e dos visitantes, e convida a seguir gozando do ambiente e da oferta comercial que cada semana dá vida ao mercado de Viveiro, un referente na comarca.