O Landro e a Xunta de Cofradías abren unha nova edición do concurso que honra a Blas García Liz
O Concello de Viveiro, a Xunta de Cofradías e a Banda de Música “O Landro” anuncian oficialmente a apertura da nova convocatoria do IV Concurso de Composición de Marchas Procesionais “Blas García Liz 2026”, unha cita que se consolida como un dos referentes galegos para a creación musical vinculada á Semana Santa. A organización subliña que o certame representa “un espazo único para que autores de calquera procedencia poidan achegar o seu talento e contribuír á tradición cultural viveirense”.
Segundo explican desde a Banda “O Landro”, entidade promotora, o concurso pretende fomentar a creación de novas pezas que “enriquezan o repertorio procesional con obras cheas de devoción, sensibilidade e calidade artística”. Desde a súa primeira edición, o certame recibiu composicións chegadas de numerosos puntos do país, e mesmo do estranxeiro, o que confirma o seu crecemento e proxección.
A participación está aberta a compositores de todas as idades e nacionalidades. As obras deberán ser orixinais e completamente inéditas, sen ter sido interpretadas nin difundidas por ningún medio, nin de forma parcial nin completa. As bases poden consultarse a través do código QR incluído no cartel oficial, así como na ligazón facilitada polas entidades convocantes e na biografía do seu perfil de Instagram.
Para preservar o anonimato e garantir un proceso de selección rigoroso, as partituras deberán remitirse en formato PDF sen o nome do autor, acompañadas dun arquivo de audio en mp3. Xunto á obra, os participantes deberán entregar o formulario de inscrición segundo o modelo establecido, que será custodiado polo coordinador do certame ata o fallo do xurado.
A organización marca como data límite o 9 de xaneiro de 2026 ás 23:59 horas para a recepción de propostas, que deberán enviarse unicamente por correo electrónico á dirección: composicionblasgarcializ@gmail.com.
O xurado desta cuarta edición estará composto polos compositores Fernando Buide del Real e David Rivas Domínguez, ademais do director David Fiuza Souto, tres figuras de recoñecido prestixio no ámbito da música contemporánea e das bandas.
A obra gañadora será estreada pola Banda de Música “O Landro” no marco do programa cultural Adral 2026, e recibirá un premio económico de 2.000 euros, aos que se aplicarán as retencións fiscais correspondentes.
Desde a organización animan á participación e destacan que este concurso “mantén viva unha tradición esencial para a identidade de Viveiro, ao tempo que impulsa a innovación artística e ofrece unha plataforma real para que creadoras e creadores poidan ver interpretado o seu traballo”.