O II Torneo de Mus da Mariña Vila de Ribadeo reunirá 40 parellas
O pub Ribanzo de Ribadeo acollerá o vindeiro 22 de marzo o II Torneo de Mus da Mariña Vila de Ribadeo, un evento que reunirá a 40 parellas de xogadores desde as 10:00 da mañá. A competición, organizada por Asesmus e o propio local, conta coa colaboración do Concello de Ribadeo e de Gaudeamus Lugo.
A presentación do torneo tivo lugar no Concello, coa presenza do alcalde, Dani Vega, do delegado da Asociación Española de Mus en Lugo, Atxa, e de Jesús Santos, un gran apoio na organización do evento. Actualmente, hai 39 parellas inscritas das 40 dispoñibles, pero o prazo para anotarse segue aberto ata o xoves, 20 de marzo.
O sistema de xogo dividirase en Torneos A, B e C, con fases preclasificatorias e eliminatorias. A primeira rolda comezará ás 10:00 horas, e a quinta está prevista para as 16:30 horas.
Os gañadores do Torneo A recibirán unha invitación para o Máster Nacional 2025, que se celebrará en novembro en Marbella/Estepona, incluíndo aloxamento en hotel e media pensión, ademais de tres invitacións para o premáster. As parellas vencedoras dos Torneos B e C recibirán, entre outros agasallos, dúas invitacións para o premáster.