O IES María Sarmiento de Viveiro achega a música en galego actual ao seu alumnado
O alumnado do IES María Sarmiento de Viveiro tivo a oportunidade de achegarse á música en galego actual grazas á exposición "Galegoza. A canción en galego", promovida pola Vicepresidencia da Deputación de Lugo. A mostra, que se atopa aberta ao público no centro educativo desde esta semana, pretende dar a coñecer a mozos e mozas a rica e variada oferta musical no noso idioma.
A exposición, que iniciou o seu percorrido polas escolas secundarias da provincia o pasado outubro, está composta por unha trintena de paneis que repasaron a evolución histórica da música en galego desde os anos 60 ata a revolta creativa que vivimos hoxe. A través das bandas e solistas máis influíntes de diferentes estilos —como ritmos tradicionais revisados, pop, rock, canción de autoría, experimentación, electrónica, hip hop ou rap—, a mostra ofrece unha visión completa de como a música en galego se foi adaptando aos tempos modernos.
Ademais, os paneis inclúen códigos QR que dirixen a unha lista de reprodución propia do proxecto, onde o alumnado pode escoitar unha selección de temas representativos da evolución musical que se describe na exposición.
O comisario da mostra, Pepe Cunha, responsable do portal Ábrete de Orellas, estivo esta mañá no instituto para comentar co alumnado o contido da exposición, que permanecerá no centro durante dúas semanas.