O Grupo Provincial Popular leva a súa actividade a Xove para coñecer iniciativas sociais e empresariais
Os deputados do Grupo Provincial Popular continuaron coa súa estratexia de descentralización das reunións de traballo cunha nova xornada en Xove, onde mantiveron encontros con entidades sociais e representantes do tecido empresarial da comarca.
Durante a visita, os membros do grupo popular desenvolveron diversas xuntanzas co obxectivo de coñecer de primeira man os proxectos que se están a impulsar no municipio e analizar as súas necesidades e retos actuais. Ademais, tiveron a oportunidade de achegarse a unha iniciativa empresarial da zona, na que puideron comprobar directamente o seu funcionamento e o seu impacto na economía local.
O voceiro provincial do Partido Popular, Antonio Ameijide, explicou que este tipo de desprazamentos forman parte dunha liña de traballo que busca levar a actividade política máis alá da capital da provincia. Segundo indicou, o propósito é “percorrer o territorio para poñer en valor as potencialidades de Lugo e dar visibilidade a iniciativas que contribúen ao seu desenvolvemento”.
Ameijide incidiu na importancia de manter un contacto directo co tecido social e económico, destacando que existen numerosos proxectos que están a xerar oportunidades nos distintos concellos. Neste sentido, subliñou que resulta fundamental escoitar ás persoas e entidades implicadas, así como apoiar o seu labor.
Pola súa banda, o alcalde de Xove e tamén deputado provincial, Demetrio Salgueiro, puxo o foco nas iniciativas de carácter social que se están desenvolvendo no municipio. Segundo explicou, estes proxectos teñen un papel relevante na mellora dos servizos e na atención ás necesidades da veciñanza, ao tempo que contribúen a fixar poboación na comarca.
Salgueiro destacou tamén o potencial da comarca da Mariña, sinalando que é necesario apoiar tanto as iniciativas sociais como os proxectos empresariais que apostan por desenvolver a súa actividade no territorio.
Con esta visita, o Grupo Provincial Popular reafirma o seu compromiso de seguir impulsando un modelo de provincia baseado na xeración de oportunidades en todos os concellos. “Lugo conta con múltiples recursos e iniciativas que merecen ser recoñecidas, e queremos actuar como altofalante de todo o que se fai ben no conxunto do territorio”, concluíu Ameijide.