O Grupo Municipal do PSdG-PSOE de Viveiro aclara a liquidación do orzamento 2024
O Grupo Municipal do PSdG-PSOE de Viveiro aclarou a situación da liquidación do orzamento 2024, destacando que o Concello cumpriu co obxectivo de estabilidade orzamentaria, coa regra de gasto e co límite de débeda pública. Segundo informaron, o Concello pechou o exercicio 2024 cunha capacidade de financiamento de 560.893,71 €, o que permite cumprir tamén coa regra de gasto, que compara o gasto computable do exercicio co gasto máximo do ano anterior. Así, en 2024, o gasto computable ascendeu a 11.604.376,58 €, fronte aos 11.911.860,82 € de 2023. Pola súa banda, o nivel de débeda pública do Concello pechou en 6.697.444,66 €, o que supón un 45,38 % dos ingresos correntes ordinarios. En canto ao período medio de pago, o cuarto trimestre de 2024 finalizou cun prazo de 35,26 días.
En resposta á intervención do novo Concelleiro de Economía e Facenda, Martín Vale, durante o pleno de organización, o grupo socialista manifestou o seu desacordo coas cifras presentadas polo novo equipo de goberno, especialmente no que respecta ao desfase nas contas municipais, que o concelleiro situou en 800.000 € en negativo. O PSdG-PSOE lembrou que, durante anos, o Concello de Viveiro tivo que realizar malabares para cadrar o orzamento e que este ano non foi diferente. A diferenza entre as facturas pendentes de aplicación, que suman 427.669,74 €, tamén foi puntualizada, destacando que estas facturas son relativas a servizos como o alugueiro de equipos para as festas patronais, enerxía eléctrica, recollida de lixo e outros suministros. Ademais, subliñaron os 38.000 € pendentes de pago por promoción turística.
Outro dos puntos que o grupo socialista quixo aclarar foi o remanente de tesourería, que foi de 1.780.103,08 € antes de deducir os créditos pendentes de cobro de difícil recadación, deixando un remanente negativo de 219.045,50 €, que deberá ser incluído no orzamento de 2025, xunto cunha devolución de ingresos de 4.467,64 €. Respecto ás subvencións non pagadas a asociacións, o PSdG-PSOE explicou que a responsabilidade non recae no anterior goberno, senón nas asociacións e clubs que non presentaron a documentación xustificativa a tempo.
Finalmente, o grupo socialista tamén fixo mención á débeda histórica do Concello, que en 2014 ascendía a 13,2 millóns de euros. Desde entón, e a pesar das dificultades, o Concello conseguiu amortizar 7,07 millóns de euros, reducindo a débeda actual a 6.697.444,69 €. Ademais, subliñaron que, malia as dificultades provocadas polo encarecemento dos servizos e bens tras a pandemia, o Concello de Viveiro foi capaz de facer fronte ás facturas de 2023 que non puideron ser atendidas no seu momento, utilizando o remanente de tesourería do ano anterior e incluíndo os gastos no orzamento de 2024.