O Goberno local de Viveiro reaxusta soldos mantendo o mesmo gasto total

A rexedora popular pasaría a cobrar 59.000 euros anuais fronte aos 43.500 da súa predecesora socialista

O Concello de Viveiro someterá a debate este venres na comisión de Economía e Facenda a proposta de reestruturación salarial do goberno municipal, que podería ser aprobada no pleno de organización da próxima semana.

A alcaldesa Mariña Gueimunde (PP) propón un incremento do seu soldo respecto á anterior rexedora, María Loureiro (PSOE), pasando dos 43.500 euros brutos anuais a 59.000. A pesar deste aumento, o gasto total en soldos do equipo de goberno manteríase nos 84.500 euros, a mesma cifra que destinaba o anterior goberno socialista, pero distribuída de maneira diferente.

Así, mentres Gueimunde terá unha dedicación exclusiva maior que a súa antecesora, o edil de Obras, Parques e Xardíns, Vicente Chao, cobrará 25.000 euros anuais, unha cantidade inferior aos 41.000 que percibía a extenente de alcaldesa do BNG, Miriam Bermúdez. Para que esta proposta saia adiante no pleno, precisará o voto favorable de Por Viveiro.