O Festival Histórico Augas Santas celebra a súa duodécima edición cunha homenaxe ás tradicións e á gastronomía da zona
Barreiros prepárase para acoller unha nova edición do seu festival máis singular. O vindeiro sábado 21 de xuño, Santo Estevo do Ermo converterase no epicentro da recreación histórica e da celebración das tradicións populares coa XII edición do Festival Histórico Augas Santas, organizado pola Irmandade Augas Santas coa colaboración do Concello de Barreiros e a Deputación de Lugo.
O evento contará cun completo programa que mestura cultura, historia, gastronomía e espectáculos para todos os públicos. Entre as actividades previstas destacan a ruta a cabalo, un mercado de artesanía, e a escenificación teatral da figura do Rei Silo, nunha posta en escena que promete viaxar no tempo ata os albores da historia galega.
Ás 13:00 horas celebrarase unha misa en honra a Santo Estevo, patrón do lugar, antes de dar paso á música e ao entretemento con actuacións como a da recoñecida banda O Arco da Vella, o grupo Souto Ximparo e o dúo Épok. A xornada tamén incluirá vodas celtas e unha tradicional queimada con conxuro, mantendo viva a conexión coas crenzas ancestrais da comunidade.
Un dos momentos máis esperados será a festa gastronómica do porquiño e año ao espeto, un banquete que mestura o sabor da terra co ritual comunitario. Por un prezo de 30 euros, os asistentes poderán gozar dunha cea que incluirá tamén sardiñas asadas, nunha velada que promete encher de sabor e confraternidade o entorno natural de Santo Estevo.
Para máis información e reservas, a organización puxo a disposición o teléfono 679 45 51 09.