O festival BreaSon regresa a Mondoñedo con música, cultura e convivencia o 8 de novembro
A Asociación Xuvenil Xoldra vén de confirmar a celebración dunha nova edición do festival BreaSon, que terá lugar o 8 de novembro en Mondoñedo. A cita, que xa se consolidou como un dos eventos máis singulares da Mariña lucense, ofrece unha programación diversa e totalmente gratuíta, orientada a promover a música, a cultura e a convivencia comunitaria.
O cartel deste ano destaca pola súa variedade e pola combinación de estilos musicais. Os escenarios do BreaSon acollerán as actuacións de Biznaga, Grande Amore, 9Louro, Malvela, Señora DJ, Femfarria, María Raxeta e Meniñ@s da Mariña, nunha mestura que vai dende o rock alternativo ata as raíces da música tradicional galega.
Ademais dos concertos, o festival contará cunha carpa principal e ofrecerá acampada interior, unha iniciativa pensada para facilitar a participación de asistentes chegados de distintos puntos de Galicia. O programa completarase cunha ampla oferta de actividades paralelas, entre as que se inclúen obradoiros, roteiros, catas, unha foliada popular, un magosto e mesmo unha habitación de escape, o que converterá a xornada nunha auténtica festa cultural e participativa.
Desde Xoldra salientan que o BreaSon non é só un evento musical, senón “un espazo de encontro no que a xente nova pode compartir experiencias, ideas e ilusións arredor da cultura”. A asociación xuvenil destaca tamén o carácter colaborativo do proxecto e o apoio da comunidade local, que ano tras ano fai posible esta celebración.