Economía

O documento económico contou coa abstención do BNG e o voto en contra do PSOE e prevé investimentos iniciais por máis de 431.000 euros

O Concello do Vicedo aprobou os orzamentos municipais para o exercicio 2026 nun pleno no que as contas saíron adiante cos votos favorables do goberno local, mentres que o BNG optou pola abstención e o PSOE votou en contra. O documento económico fixa un volume total de 2.650.000 euros e establece as principais previsións de ingresos e gastos para o próximo ano.

Entre as partidas máis destacadas atópanse as destinadas ao investimento público. As inversións reais recollidas inicialmente no orzamento suman 431.187,12 euros. Con todo, desde o executivo municipal sinalan que esta cantidade podería aumentar notablemente ao longo do exercicio, xa que o documento non incorpora as subvencións que aínda non están concedidas. A previsión é que, unha vez confirmadas novas axudas procedentes doutras administracións, o volume de investimento poida chegar a triplicar a cifra inicial.

No documento só se recollen as achegas que xa están garantidas, como as correspondentes ao Plan Único da Deputación e tamén as procedentes do fondo de compensación ambiental, que neste caso estarán orientadas a actuacións vinculadas ao aforro e á eficiencia enerxética.

No apartado de gastos, a maior parte do orzamento concéntrase nos custos de funcionamento do Concello. A partida máis elevada corresponde ao persoal municipal, cun total de 1.114.820 euros destinados a cubrir os gastos derivados da estrutura administrativa e dos servizos públicos locais.

Outro bloque importante é o destinado ao gasto en bens correntes e servizos, que alcanza os 940.993,16 euros. Esta partida inclúe o mantemento de instalacións, a prestación de servizos municipais e diferentes actuacións necesarias para o funcionamento ordinario da administración local.

Ademais, o documento económico contempla unha reserva de 88.709,72 euros destinada ao fondo de continxencia e imprevistos, unha ferramenta que permite afrontar posibles necesidades ou situacións inesperadas que poidan xurdir ao longo do ano.

No capítulo de ingresos, os impostos directos constitúen unha das principais fontes de financiamento do Concello, cunha previsión de 864.052,36 euros. Nesta cifra non se inclúen, polo momento, os 32.000 euros correspondentes a un parque eólico que foi asumido por outra empresa e cuxo pago se espera que se faga efectivo máis adiante.

Pola súa parte, as taxas e prezos públicos permitirán ingresar 300.876,56 euros, mentres que as transferencias correntes procedentes doutras administracións ascenderán a 1.093.854,53 euros, configurándose tamén como unha das partidas máis relevantes para o equilibrio das contas municipais.

Con estas previsións económicas, o Concello do Vicedo define a planificación financeira para o ano 2026, cun orzamento que combina o financiamento dos servizos básicos co impulso de novos investimentos que poderían ampliarse a medida que se confirmen novas subvencións.