O Concello de Viveiro lanza unha canle oficial de WhatsApp para informar á veciñanza
O Concello de Viveiro vén de activar a súa canle oficial de WhatsApp como un novo medio de comunicación directa coa cidadanía, co obxectivo de achegar a información municipal dun xeito máis áxil, sinxelo e accesible. A iniciativa pretende facilitar que os veciños e veciñas estean ao día das principais novidades do municipio en tempo real.
A través desta canle, as persoas subscritas poderán recibir avisos urxentes e notificacións sobre incidencias, como cortes de tráfico ou cambios en servizos municipais, así como información relacionada coa programación festiva, actividades culturais e eventos de interese xeral. Ademais, tamén se difundirán contidos vinculados a axudas públicas, oportunidades de emprego e propostas formativas.
Desde o Concello destacan que se trata dunha ferramenta pensada para o uso cotián, cun formato cómodo e intuitivo, que non require interacción por parte dos usuarios e garante a privacidade das persoas subscritas. O servizo complétase co resto dos canais informativos municipais, reforzando así a comunicación institucional.
As persoas interesadas poden unirse á canle oficial do Concello de Viveiro a través da ligazón habilitada en WhatsApp ou mediante o acceso dispoñible na biografía do perfil municipal en Instagram. Unha vez dentro, recoméndase activar as notificacións premendo na icona da campá para recibir os avisos no momento da súa publicación.