O Concello de Viveiro activa cisternas con auga potable como medida preventiva pola vertedura no Landro
O Concello de Viveiro anunciou que, como medida adicional á restrición preventiva no uso da auga da traída, este domingo estarán operativas dúas cisternas de auga potable ao servizo da cidadanía. Trátase dunha acción orientada a garantir o abastecemento seguro, especialmente para as persoas con máis dificultades de acceso á auga embotellada durante a fin de semana.
Un dos vehículos estará situado en Covas, concretamente na explanada situada entre Os Castelos e o Pazo de Grallal. O outro camión instalarase nos Xardíns Noriega Varela, a carón do templete, no centro da vila.
Desde o Concello explican que esta medida busca dar resposta ás necesidades puntuais da veciñanza, tendo en conta que a xornada dominical complica o acceso á compra de auga embotellada, tanto en fogares sen posibilidade de desprazamento como en negocios da hostalería.
As autoridades locais lembran que o abastecemento xeral continúa operativo e que estas actuacións se enmarcan dentro do principio de precaución tras a vertedura rexistrada no río Landro. Tamén sinalan que se irá informando puntualmente sobre a evolución da situación e que se facilitarán os resultados definitivos das análises en canto estean dispoñibles.