O Concello de Trabada reforza os lazos coa veciñanza nas visitas de Nadal ao CAM e ao CEIP Celso Currás
O alcalde de Trabada, Rubén García, acompañado pola concelleira de Medio Rural, Rosa Pérez, realizou nos últimos días a tradicional visita de Nadal ao Centro de Atención a Maiores (CAM) e ao CEIP Celso Currás, unha iniciativa que o Concello mantén ano tras ano como parte do seu compromiso coa veciñanza.
Durante a xornada, os representantes municipais tiveron a oportunidade de compartir momentos de conversa e convivencia tanto coas persoas maiores como co alumnado do centro educativo, aos que lles fixeron entrega dun pequeno agasallo como símbolo de afecto e recoñecemento. Estes encontros buscan fortalecer unha relación próxima e familiar cos distintos colectivos do municipio, prestando unha atención especial á infancia e ás persoas maiores, pilares fundamentais da comunidade local.
Rubén García puxo en valor o significado destas visitas, sinalando que “o Nadal é un momento especialmente axeitado para achegarnos ás persoas que forman parte esencial da nosa comunidade. Compartir tempo, escoitar e transmitir proximidade aos maiores e aos nenos e nenas é unha maneira de reforzar ese vínculo humano que queremos manter desde o Concello”.
Pola súa banda, Rosa Pérez destacou a importancia de conservar esta tradición, que considera unha ferramenta clave para estreitar relacións entre a administración local e a cidadanía. Segundo indicou, “estas visitas contribúen a facer do Nadal un tempo máis próximo e máis humano, no que se reforzan os lazos de confianza e de convivencia”.
Desde o Concello de Trabada sublíñase a boa acollida que estas visitas teñen cada ano, formando parte dunha liña de traballo centrada en acompañar, coidar e estar presentes no día a día dos centros e colectivos do municipio, especialmente en datas tan sinaladas como as do Nadal.