O Concello de Trabada impulsa un Mercadiño de Nadal con música, obradoiros e visitas especiais para as familias
O Concello de Trabada vén de anunciar unha nova edición do Mercadiño de Nadal, unha iniciativa que se celebrará o sábado 20 de decembro na Praza do Concello, deseñada para dinamizar a vida social do municipio e ofrecer unha ampla programación para todas as idades. O evento está organizado en colaboración coa A.C. Veiguello, a A.C. O Picato e o Motoclube A Cadeira, entidades que un ano máis se implican de maneira activa na posta en marcha desta cita festiva.
A actividade comezará ás 11:30 horas coa apertura oficial do mercadiño, que contará con postos de produtos locais, artesáns e propostas de lecer para o público familiar. Pouco despois, ás 12:00 horas, presentarase unha exposición fotográfica da Asociación Cultural O Veiguello de Villaformán, ofrecendo ao público unha mostra do seu traballo artístico e documental.
Ás 12:30 horas celebrarase un obradoiro de postais de Nadal dirixido aos máis pequenos, unha proposta pensada para fomentar a creatividade infantil e o espírito destas datas. A música tamén terá un papel protagonista: ás 13:00 horas, o músico Vadim Yukhnevich ofrecerá unha actuación aberta ao público, achegando ambiente festivo á mañá.
A programación continuará pola tarde, ás 15:00 horas, cun contacontos infantil titulado A Apalpadora, pensado para achegar a tradición e fomentar a participación dos nenos e nenas. A partir das 16:30 horas, o Motoclube A Cadeira organizará unha papanoleada moteira, que incluirá unha degustación gratuíta de chocolate quente e biscoito para todas as persoas asistentes. A mesma entidade será a encargada do servizo de bar durante toda a xornada.
Un dos momentos máis esperados chegará ás 18:00 horas, coa visita de Papa Noel e do Apalpador, que traerán ilusión e pequenos agasallos para os nenos e nenas presentes. Ao longo de todo o día, ademais, haberá inchables gratuítos e actividades complementarias para completar unha programación pensada para dinamizar o comercio local e ofrecer unha xornada de convivencia á veciñanza e visitantes.
O Concello de Trabada expresa o seu agradecemento ás entidades colaboradoras —A.C. Veiguello, A.C. O Picato e o Motoclube A Cadeira— pola súa implicación constante. Desde a administración local convídase á cidadanía a gozar desta proposta festiva no corazón do municipio.