O Concello de Ribadeo rexeita a sanción da Deputación e insiste nas súas alegacións
O Concello de Ribadeo presentará por terceira vez alegacións contra a sanción imposta pola Deputación de Lugo. O alcalde, Dani Vega, cualificou de “lamentable” a actitude dos partidos que gobernan a institución provincial, PSOE e BNG, asegurando que “insisten en multar aos veciños de Ribadeo” cunha decisión que considera un “ataque directo” e unha mostra de “sectarismo político”.
Vega expresou o seu malestar ante o que considera unha falta de respecto institucional: “A política non consiste en atacar ao rival político, senón en colaborar entre administracións. Esta resolución é nula porque ignora as alegacións do Concello, cando xa foron presentadas en dúas ocasións. A Deputación actúa como se estas non existisen, faltándolle ao respecto aos técnicos municipais”.
O alcalde defendeu que o Concello de Ribadeo actuou en resposta ás demandas veciñais sobre o desbroce e mantemento de estradas, especialmente na contorna da Praia das Catedrais, onde se rexistraron varios accidentes. “A Deputación non ofrece ningunha solución nin plan de limpeza, e agora pretenden sancionar ao Concello por facer o traballo que eles non fan”, lamentou Vega.
Ante esta situación, o goberno local volverá presentar alegacións apoiadas por informes dos técnicos municipais e da Policía Local. Vega teme que a falta de limpeza por parte da Deputación se repita esta primavera e verán, como xa ocorreu en anos anteriores, cando os traballos non se realizaron ata setembro.
O rexedor tamén denuncia unha dobre vara de medir: “Por que sancionan a Ribadeo mentres que noutros concellos gobernados por PSOE e BNG, que fixeron os mesmos traballos, non lles aplicaron ningunha multa? Non imos permitir este ataque directo nin esta discriminación política”.
Finalmente, Vega instou á Deputación a reflexionar e a actuar con imparcialidade: “As administracións deben investir nos concellos sen escoller a quen beneficiar. Desde o Concello de Ribadeo defenderemos os intereses dos nosos veciños e recorreremos todas as sancións que consideremos inxustas, sempre dentro da legalidade”.