O Concello de Cervo entrega axudas municipais aos centros educativos do municipio
A alcaldesa de Cervo, Dolores García Caramés, reuniuse cos directores dos tres centros educativos do municipio —CEIP de Cervo, CEIP Península da Paz e IES Marqués de Sargadelos— para facerlles entrega dos cheques correspondentes ás axudas municipais destinadas á comunidade educativa.
Caramés explicou que estas achegas económicas supoñen un apoio estable e complementario ao que o Concello ofrece ao longo de todo o curso, tanto en materia de mantemento como na cobertura de diversas necesidades organizativas. Subliñou que o obxectivo destas axudas é favorecer o correcto funcionamento dos centros e contribuír ao desenvolvemento de proxectos e iniciativas que melloren directamente o proceso educativo do alumnado.
As axudas, que ascenden a 1.250 euros por centro, permiten reforzar actividades formativas, complementarias ou extraescolares, ademais de sufragar pequenos gastos derivados da vida diaria dos centros. A rexedora lembrou que esta liña de apoio se enmarca nun conxunto máis amplo de medidas que o Concello mantén activas en materia educativa, como as axudas ao transporte ou as destinadas á adquisición de libros e material escolar, co obxectivo de garantir a igualdade de oportunidades e facilitar a conciliación das familias.
Dolores García Caramés reiterou o compromiso do goberno local coa educación, destacando que “investir nos centros é investir no futuro da nosa mocidade e no desenvolvemento do municipio”.