O Concello de Barreiros presenta a súa nova App turística
O Concello de Barreiros organiza para este xoves, 21 de novembro, ás 11.00 horas, a presentación da súa nova App turística. O evento terá lugar nas escolas de San Cosme e está dirixido a todas as persoas interesadas, con especial atención ao sector servizos e á hostalaría.
Esta aplicación, deseñada para ofrecer unha experiencia única, permitirá acceder a toda a información turística do municipio dunha maneira máis práctica e accesible. Entre os seus recursos pódense atopar: Os principais lugares de interese; a información sobre as praias; un directorio de establecementos hostaleiros; rutas de senderismo; guías para desfrutar de Barreiros en 1, 2 ou 3 días; e outros recursos para descubrir os encantos de Barreiros.
Esta iniciativa, segundo trasladan desde o Concello, busca modernizar a promoción turística e facilitar o acceso á información, reforzando a aposta por posicionarse como un destino atractivo e accesible para todos os públicos mellorando a experiencia das persoas visitantes e poñendo en valor os recursos do municipio.
A aplicación xa está dispoñible para descargar en sistemas Android e iOS.