Este xoves pola mañá reuniuse o Comité de Empresa de Alcoa co presidente da Xunta de Galicia, Alfonso Rueda, para solicitar unha maior implicación do goberno autonómico na busca de solucións para o futuro da planta de San Cibrao. No encontro, no que tamén participaron a conselleira de Industria, o delegado da Xunta en Lugo, o alcalde de Xove e a alcaldesa de Cervo, tratouse a necesidade de que a Xunta realice un novo requirimento a Alcoa para que presente a documentación pendente, fundamental para aprobar o recrecido do Depósito de Barro Vermello (DBR) e garantir a continuidade da actividade industrial.
Como resultado desta xuntanza, o Comité de Empresa decidiu anular a concentración prevista para este xoves ás 11.30 horas, xa que se conseguiu o obxectivo principal de obter o compromiso do presidente na busca dunha solución concreta para o complexo de San Cibrao.
Alfonso Rueda comprometeuse a asistir á próxima reunión de seguimento en Madrid, reiterando o seu apoio ao futuro do complexo e a unha posible intervención pública na factoría. O presidente da Xunta tamén sinalou o desinterese de Alcoa nos trámites necesarios para a ampliación do DBR, facendo un chamamento a deixar de lado as disputas políticas e unir esforzos co Goberno central para presionar á multinacional e axilizar o proceso.
Unión institucional para garantir o futuro industrial
O Comité de Empresa de Alcoa subliñou a urxencia de tramitar de forma áxil a ampliación do DBR para asegurar todos os postos de traballo na planta e nas empresas contratistas. Ademais, solicitarán que na próxima reunión de seguimento do acordo estean presentes os ministros de Industria e Transición Ecolóxica, para mostrar a máxima implicación posible. O presidente da Xunta xa confirmou a súa asistencia a esta xuntanza clave para o futuro da industria do aluminio na Mariña lucense.
