O Comité de Empresa de Alcoa convoca unha asemblea para abordar o traslado de traballadores
O Comité de Empresa de Alcoa de San Cibrao vén de anunciar a convocatoria dunha asemblea, que será o vindeiro mércores 22 de xaneiro, co obxectivo de tratar o traslado de 31 operarios que actualmente desempeñan as súas funcións no departamento de eléctrodos, onde se fabrican os ánodos. Estes traballadores pasarán a incorporarse ao departamento de electrólise a partir do 1 de abril, coincidindo co inicio da segunda fase de posta en marcha das cubas destinadas á produción de aluminio.
O traslado dos empregados responde á chegada dun novo forno de cocción ao departamento de eléctrodos, dentro do proceso de reorganización laboral vinculado á reactivación progresiva das instalacións para a fabricación do aluminio primario. Esta segunda fase de acendido das cubas marca un paso importante na recuperación da actividade produtiva da planta.
A asemblea servirá como espazo para informar aos traballadores afectados sobre os detalles deste proceso e para abordar as preocupacións relacionadas co cambio de posto, así como as súas implicacións laborais e organizativas, pois dende o comité consideran que este cambio é "ilegal e vai en contra do dereito á información e consulta do comité".
O Comité de Empresa reitera o seu compromiso de garantir que o proceso se desenvolva de forma transparente e acorde aos dereitos dos empregados. Polo que din, "a empresa non comunicou por canto tempo será o traslado, tampouco aclarou aos sindicatos ata que nivel teñen programado o rearranque da fábrica, que no acordo asinado debe acadar o 100 % das cubas no mes de outubro, malia que a empresa quere rebaixalo ao 75 %".
Os representantes sindicais animan a todos os traballadores afectados a participar na asemblea e a expoñer as súas inquietudes, destacando a importancia da unidade neste momento clave para o futuro da planta e da súa forza laboral.