O colexio de Xove recupera as figuras tradicionais do entroido para as novas xeracións
O Entroido que acabamos de deixar atrás foi un evento moi especial para as nenas e nenos do colexio de infantil e primaria do municipio de Xove. Este ano, o equipo docente, en colaboración co departamento de Investigación Social e Cultura do Concello de Xove, organizou unha serie de actividades que permitiron ás xeracións máis novas descubrir as figuras tradicionais do entroido local, como a madamita e o galán.
As e os escolares traballaron nas aulas para coñecer as orixes destes disfraces, que son representativos de días importantes do entroido, especialmente do martes de carnaval, aínda que tamén se usaban no domingo de Lordeiro, o domingo previo ao martes de carnaval. O termo "domingo Lardeiro" está adaptado á fala de Xove e é recollido no dicionario do entroido de Galicia.
Os rapaces e rapazas aprenderon sobre o significado do carnaval, un período liberador e paródico no que se caricaturizaban as figuras públicas e, como non, as clases dominantes. Así, tanto a madamita como o galán eran unha forma de ridiculización, baseándose na esaxeración dos elementos luxosos nas vestimentas das persoas máis ricas e influentes da época.
Cada curso traballou na creación dun complemento para os disfraces das madamitas e dos galáns: algúns fixeron sombreiros, outros colares e bolsos, mentres que outros se encargaron de cortar e pegar adornos na vestimenta. Unha vez finalizado este labor, todo o centro educativo uniu os seus traballos para conformar as figuras dos dous maniquís tradicionais do entroido de Xove. Con gran emoción, os nenos e nenas viron como, durante as semanas previas ao entroido, tomaban forma as dúas figuras do carnaval local. Os maniquís foron expostos no recibidor do centro durante todo o entroido, sendo o centro de atención dos máis pequenos.
Os mandatos do meco para o colexio tamén estiveron relacionados co traballo continuo na maquillaxe das madamitas e dos galáns, unha actividade que formou parte do día a día do alumnado durante as festividades.
O Concello de Xove, a través dos seus departamentos de Investigación Social e Cultura, destaca a importancia de recuperar e preservar estes elementos do patrimonio cultural inmaterial, ademais de integralos no ensino formal e informal. Esta acción cobra máis relevancia agora que a Xunta de Galicia acaba de declarar o Entroido como Ben de Interese Cultural do Patrimonio Inmaterial de Galicia.