O club de lectura da EOI de Ribadeo abordará 'Resaibo amargo' na súa segunda xuntanza
O club de lectura en lingua galega da Escola Oficial de Idiomas (EOI) de Ribadeo celebrará a súa segunda xuntanza o vindeiro 18 de marzo. Despois dunha exitosa primeira convocatoria no trimestre anterior, o club reunirá aos seus membros na biblioteca da EOI ás 17:00 horas para falar sobre ‘Resaibo amargo’, o primeiro libro publicado pola escritora Lucía Ferro.
Este club de lectura está aberto non só ao alumnado da EOI, senón tamén a todas as persoas que desexen participar e compartir a súa visión sobre a obra. Nesta nova edición, ademais, contará coa colaboración de voluntarios do programa de voluntariado da EOI, que se está a desenvolver polo segundo ano consecutivo.
O libro ‘Resaibo amargo’, dispoñible nas librarías da zona, tamén pode ser consultado na propia biblioteca da EOI e nas bibliotecas públicas da contorna. O cartel promocional da xuntanza inclúe un código QR que permitirá achegarse á autora e coñecer máis sobre a súa obra.
Esta xuntanza é unha oportunidade para fomentar a lectura en galego e para compartir reflexións sobre a obra de Lucía Ferro, un espazo aberto á comunidade onde se convida a todos os interesados a participar nunha tarde de cultura e literatura.