O Club Bádminton Vegadeo segue facendo historia e leva o seu talento ás convocatorias nacionais
O Club Bádminton Vegadeo continúa sumando éxitos e consolidando a súa posición como referente do bádminton base en España. A entidade asturiana vén de acadar unha nova fazaña: será o único club do país con catro xogadores convocados á concentración nacional sub-11 e sub-13, que se celebrará do 29 de maio ao 1 de xuño en La Roda, Albacete.
O talento das súas promesas tamén brillou con luz propia no Máster Sub-13, tanto na categoría N1 como na N4, celebrado en San Lorenzo del Escorial (Madrid). Mateo Amor proclamouse campión en individual masculino sub-13 N4, mentres que Nadia Alonso asinou unha actuación estelar, levando o ouro tanto en individual como en dobres sub-13 N1. Pola súa banda, Eneko Rodríguez acadou a medalla de prata en dobres mixto. Tamén deixaron un gran sabor de boca Joel Alonso, Álvaro Seijo e Marta Santamarina.
A nivel colectivo, o 12 de abril o club asinou unha xesta histórica ao proclamarse campión invicto da Liga Nacional de Clubes – Segunda Territorial. Nunha xornada impecable, venceron ao CB A Estrada (3-2), CB Cíes de Vigo (5-0) e CB Occidente (3-2), levando así o segundo título de liga para as vitrinas de Vegadeo. O equipo campión estivo formado por Marcos Cosio, Mario Covián, Román González, Silvia Mon —elixida xogadora máis valiosa da competición—, Sara Argüelles, Gabriela López, Julio González, Toñi Lavayos, Alex Acevedo e Jose Fernández, baixo a dirección técnica de Daniel Cosio e Alberto González.
O club tamén brillou no Cantabria Top TTR, disputado en Solares, onde sumaron tres medallas de ouro e dúas de prata. Gabriela López Lastra colleitou dous ouros —en individual e en dobres femininos sub-19 xunto a Alma Álvarez— e unha prata en dobres mixtos sub-15 con Alex Acevedo. Este último tamén acadou o ouro en dobres masculinos sub-15 xunto a Saúl Bernabeu. Iván Fernández González levou a prata en individual masculino sub-11, e completaron a expedición Jose Fernández, Nadia Alonso e Joel Alonso.
O pasado 21 de abril, o Concello de Vegadeo brindoulles unha recepción oficial como mostra de recoñecemento ao seu traballo, dedicación e constancia. Un xesto simbólico que reflicte o orgullo dunha vila enteira que ve no seu club de bádminton un exemplo de superación e éxito colectivo.