O CIT de A Pontenova concede a Troita de Ouro 2025 a Said Yahiaoui Mohamed
O Centro de Iniciativas Turísticas (CIT) de A Pontenova recoñece a aquelas persoas, organismos, clubes e colectivos que destacan polo seu labor en favor da pesca e os seus valores. No ano 2025, a Troita de Ouro será outorgada a Said Yahiaoui Mohamed.
Yahiaoui, profesor de economía pola Universidade de Lyon e actualmente xubilado, conta cunha ampla traxectoria no mundo da pesca deportiva. Competiu na alta competición en Francia entre 1991 e 1993 e foi capitán da selección francesa de pesca con mosca entre 1996 e 2013, acumulando un destacado palmarés internacional.
Baixo a súa dirección, a selección francesa conseguiu tres ouros por equipos nos mundiais de Suecia (2005), Inglaterra (2000) e Estados Unidos (1997); dúas pratas en Australia (1999) e Chequia (1996); e tres bronces en Noruega (2013), Nova Zelandia (2008) e Eslovaquia (2004). Ademais, foi campión de Europa de seleccións en Irlanda (2009) e Chequia (2011) e obtivo un bronce europeo en Bosnia (2010).
Con este recoñecemento, o CIT de A Pontenova pon en valor a contribución de Said Yahiaoui Mohamed ao mundo da pesca e a promoción dos seus valores a nivel internacional.
Recoñece tamén coa Troita de Ouro 2025 á Sociedade Deportiva Río Ulla. Destacan que o Concurso do Salmón do Ulla, xunto co Concurso do Salmón do Eo, son os únicos campionatos de pesca de salmón que hai en España. Consideran así que a Sociedade Deportiva Río Ulla, presidida por Manuel Sanmartín, estableceu grandes vínculos coa Pontenova na defensa da pesca.