O cine feito na casa regresa a Ribadeo coa IV edición do Festival de Cine Curto
Ribadeo prepárase para acoller unha nova edición do seu Festival de Cine Curto, que nesta cuarta convocatoria, organizada polo colectivo Areas Movedizas, volverá poñer no centro da escena o talento audiovisual vencellado á Mariña, a Galicia e Asturias. Os días 7 e 8 de agosto, o cine “feito aquí” volverá tomar a vila, cunha programación que mestura curtametraxes de distintos xéneros, actividades culturais e unha firme aposta pola creación local.
Nacido no 2022 coa intención de achegar o cine curto á veciñanza e reivindicar que na contorna tamén se fan boas historias, o festival chega á súa cuarta edición con máis forza ca nunca. “Queremos seguir facendo do cine un espazo de encontro, de emocións compartidas e de respecto polo traballo de creadoras e creadores que apostan por contar dende aquí”, sinala o equipo organizador.
Nesta edición proxectaranse oito curtametraxes escollidas entre multitude de propostas. Trátase de “Corre, Adela” de Alba Pino; “Azkena”, de Ane Inés Landeta e Lorea Lyons; “Ratiña”, de Alicia Úbeda; “Monstera”, de Diego R. Aballe; “Curmán”, de Alejandro Jato; “La Reina de los Idiotas”, de J.K. Álvarez; “Campolivar”, de Alicia Moncholí; e “Komando Marmitako”, de Ane Nafarrate e Uxue Botas. As pezas abranguen xéneros como o drama, a comedia, o biopic, a animación ou o cinema experimental, amosando a diversidade e riqueza creativa que caracteriza ao festival.
A cita coas curtametraxes será o mércores 7 de agosto, ás 20:00 horas no Cine Ribadeo. O día seguinte, xoves 8, tamén ás 20:00, celebrarase a Gala Final no Teatro de Ribadeo. Será nese acto cando se desvele a curta gañadora, elixida polo propio público a través dos seus votos, nun exemplo máis do carácter participativo e horizontal do evento.
A actriz galega Mabel Rivera, recoñecida por filmes como Mar Adentro —polo que recibiu o Goya á mellor actriz de reparto—, será a madriña desta edición. Rivera, que xa presentara unha curta en anteriores edicións, regresará agora para entregar o trofeo e compartir coa veciñanza o seu apoio ao cine local.
A Gala Final contará tamén coa actuación do grupo ribadense Kornucopia, que achegará unha proposta musical que combina pop, folk e música tradicional con moita enerxía sobre o escenario. Como novidade, nesta edición o Festival súmase ás redes sociais da man da creadora de contido Prado Rúa, que dinamizará as alfombras vermellas e photocalls dende as 19:30 horas, tanto o día 7 como o 8, conectando así o evento cun público máis novo e dixital.
O colectivo organizador, Areas Movedizas, está formado por catro profesionais do sector audiovisual —Carme Rodríguez, Gloria González, Mónica Arnanz e Sergio García-Ramos— que achegan experiencia, paixón e unha mirada plural. Nesta edición, preséntase ademais unha nova identidade gráfica da man do deseñador Manu Cajal, mantendo como emblema a mascota do festival, O Mariñán, creación da ilustradora Elvira ELR, xa convertida nunha icona recoñecible do proxecto.
O evento conta co apoio da Xunta de Galicia, o Concello de Ribadeo, o Hotel Aduana, o Cine Ribadeo e a empresa Delira Gastronómica, reforzando así a conexión entre o festival e o tecido económico e social da vila.
Coa vista posta no seu quinto aniversario, o Festival de Cine Curto de Ribadeo consolida a súa aposta por medrar con identidade propia: desde o compromiso co territorio, co talento creativo e co público que cada ano fai posible esta celebración do cine pequeno con alma grande.