O CIFP Porta dá Auga, de Ribadeo, acolle unha xornada sobre pintura de alta decoración
O Centro Integrado de Formación Profesional (CIFP) Porta dá Auga, de Ribadeo, acolle unha xornada sobre pintura de alta decoración este xoves, 21 de decembro, ás 16:00 horas. É unha actividade organizada polo departamento de Edificación e Obra Civil do centro coa colaboración das empresas Eurocolor e Valpaint. Está dirixida ao alumnado do centro, a profesionais do sector e a outras persoas interesadas nesta materia e a participación é gratuíta, pero os que queiran asistir deben inscribirse previamente a través do teléfono 609 009 998 ou do correo electrónico mendezdeandes@edu.xunta.gal.
O xefe do Departamento de Edificación e Obra Civil do CIFP Porta dá Auga, José Méndez de Andés, explica que “será unha xornada técnica de formación a cargo da empresa Eurocolor, apoiada por unha firma fabricante de produtos de alta decoración, Valpaint. Consistirá principalmente na aplicación de microcemento, que é algo bastante novo e que se utiliza moito ultimamente. É un material que queda moi ben, con acabados de distintas cores e pigmentos naturais. Virá un técnico para facer unha demostración da aplicación dese produto e tamén vai preparar distintos materiais de pintura de alta decoración, principalmente diversos tipos de acabados de estuco, para ver as distintas opcións que hai agora cos produtos novos que saíron ao mercado recentemente”.