O CFEA Pedro Murias renova a súa residencia de estudantes cun investimento de máis de 104.000 euros
A residencia de estudantes do Centro de Formación e Experimentación Agraria (CFEA) Pedro Murias, en Ribadeo, acaba de ser sometida a unha completa remodelación grazas a un investimento global que supera os 104.000 euros. A conselleira do Medio Rural, María José Gómez, acompañada polo director da Axencia Galega da Calidade Alimentaria, Martín Alemparte, visitou as instalacións renovadas, que estarán dispoñibles a partir do curso académico 2025-2026.
A intervención tivo como principal obxectivo mellorar a comodidade e funcionalidade da residencia, que contará con 21 prazas de aloxamento repartidas en 10 habitacións dobres e unha individual. O edificio, que ocupa máis de 500 metros cadrados distribuídos en planta baixa e dúas alturas, dispón dunha zona de lecer e un comedor na planta baixa, mentres que os pisos superiores acollen as habitacións. No primeiro andar atópanse seis cuartos dobres e un individual, ademais de baños compartidos; no segundo, catro habitacións dobres completan a distribución.
A conselleira detallou que as obras de acondicionamento estrutural supuxeron un desembolso de máis de 31.000 euros, ao que se engadiron outros 31.100 euros para novo mobiliario e preto de 1.200 euros destinados á roupa de cama. Tamén se acometeu unha actualización completa da zona de lavandería, cunha partida de case 19.000 euros, e da cociña, cuxa mellora requiriu un investimento superior aos 22.500 euros.
Durante a visita, María José Gómez salientou a importancia da formación regrada no sector primario e lembrou que o Pedro Murias forma parte da rede de seis CFEA existentes en Galicia. Segundo apuntou, estes centros "xogan un papel clave como espazos de formación, innovación e transferencia de coñecemento, contribuíndo á creación de oportunidades para o rural galego".
A aposta pola modernización das instalacións, engadiu, responde ao compromiso da Xunta coa capacitación de novos profesionais nos eidos agrario, gandeiro e forestal, sectores esenciais para o desenvolvemento sostible e a fixación de poboación no territorio.