O CFEA Pedro Murias de Ribadeo acollerá unha xornada sobre oportunidades de negocio para a faba de calidade
O Centro de Formación e Experimentación Agroforestal (CFEA) Pedro Murias de Ribadeo será o escenario o vindeiro 4 de abril dunha xornada informativa centrada nas oportunidades de negocio relacionadas coa produción e comercialización da faba de calidade, especialmente a Faba de Lourenzá. A actividade, promovida pola Xunta de Galicia en colaboración coa Asociación Galega de Cooperativas Agroalimentarias (Agaca), está dirixida a fomentar o emprendemento cooperativo e a dinamizar a economía social no rural galego.
Esta xornada forma parte dunha serie de accións de formación e I+D+i que a Xunta de Galicia está a levar a cabo para apoiar a produción de faba de calidade e garantir a súa presencia no mercado. A actividade tamén se enmarca no programa de actuación 2025 da Rede Eusumo, unha rede impulsada pola Consellería de Emprego, Comercio e Emigración, que busca promover o cooperativismo e a economía social en Galicia.
O programa do evento incluirá unha serie de conferencias e relatorios de expertos que abordarán aspectos técnicos do cultivo das fabas de calidade, desde as características agroclimáticas e a preparación do terreo ata as boas prácticas en técnicas de sementa, fertilización e rega. Ademais, Marta Mariño, directora xeral de Traballo Autónomo e Economía Social, explicará o apoio que a Xunta ofrece ás iniciativas de emprego en economía social.
Tamén se tratará a selección de sementes para a produción de faba de calidade e a súa sanidade, especialmente a de Faba de Lourenzá, que conta coa Indicación Xeográfica Protexida (IXP). O programa incluirá outros temas como o impacto do cambio climático nas cultivos, as pragas e enfermidades que afectan ás sementes de faba, e as tendencias de mercado na comercialización deste produto.
A xornada contará cunha parte presencial no CFEA Pedro Murias, pero tamén se poderá seguir en liña. As persoas interesadas en participar poden inscribirse de forma gratuíta a través da web www.agaca.coop.
Esta acción, que forma parte do conxunto de medidas que a Xunta de Galicia ten posto en marcha para apoiar o cultivo da Faba de Lourenzá, inclúe tamén axudas directas para os produtores e un instrumento financeiro para facilitar a liquidez dos agricultores. O obxectivo é apoiar aos produtores na sementeira e, ao tempo, consolidar o CFEA Pedro Murias como centro de referencia para a investigación e experimentación no sector agroalimentario galego.