O cervense Caxoto de A Trastenda dos Contos representará Levántate Xan!!! en Burela
O cervense Caxoto de A Trastenda dos Contos representará Levántate Xan!!!, espectáculo para bebés de 0 a 3 anos, o sábado 16 de outubro ás 18.00 horas na Casa da Cultura de Burela.
Serán 30 minutos de historias, xogos e cantigas na que os animais da granxa son os verdadeiros protagonistas. A entrada será de balde e o evento seguirá o protocolo covid: máscara, hidroxel e distancia de seguridade.
Xan revisa que todas as tarefas estean feitas. Fixo os deberes, limpou os dentes, fixo pis, puxo o pixama e marchou para a cama pero esqueceu algo moi importante: darlle a cea ós animais. Ó día seguinte o galo érguese cedo como cada día para espertar ó sol pero ten tanta fame que non pode cantar e todo o mundo sabe que se o galo non canta o sol non se levanta e se o sol non se levanta Xan nunca espertará e non lles dará de almorzar.
