O Centro integrado As Mercedes de Lugo acolleu a reunión dos directores de FP da provincia
O Centro integrado As Mercedes de Lugo acolleu a reunión dos directores dos 28 centros educativos públicos que imparten ensinanzas de FP na provincia de Lugo.
Entre outros asuntos, afondouse en como están a funcionar os novos módulos, así como o novo modelo de formación práctica derivado dos cambios lexislativos a nivel estatal. Así mesmo, abordáronse outras cuestións de carácter xeral de relevancia para os centros educativos, para o alumnado e para as empresas colaboradoras cos ciclos formativos.
Ademais, informouse das modificacións no procedemento de acreditación de competencias adquiridas a través da experiencia laboral ou vías de formación non formais, que permitirán que a poboación con experiencia profesional poida acreditar esta experiencia con maior axilidade e facilidade e posteriormente validala por módulos profesionais de títulos de FP. Este procedemento mellora a inserción, a integración e a progresión formativa e profesional das persoas.
No transcurso da reunión abordouse tamén o incremento de matriculación na provincia, que conta este curso con 6.998 matriculados na FP, un 8 % máis ca no ano académico 2023/24. Por áreas, o incremento é do 7,2 % na de Lugo (4.802 matriculados en total), do 10,8 % na da mariña (1.414 matriculados) e do 7,9 % na de Lemos, Chantada e Quiroga (782 matriculados).
Entre as principais novidades da oferta para este ano na provincia a implantación, por primeira vez en Galicia, do ciclo de grao medio en Condución de Vehículos de Transporte por Estrada e dos másteres de FP en Posicionamento en buscadores (SEO/SEM) e Comunicación en redes sociais, e en Redacción de contidos dixitais para márketing e vendas. Os tres ofértanse no CIFP As Mercedes da cidade da Muralla.