O BreaSon xa ten data: o festival de música de Mondoñedo celebrarase o 8 de novembro
O festival BreaSon, un dos encontros musicais emerxentes con máis tirón da comarca, regresará a Mondoñedo o vindeiro 8 de novembro, consolidando así a súa cuarta edición como unha cita clave para a mocidade e para a promoción da cultura feita en Galicia.
A data confirmouse tras a reunión mantida esta semana entre o delegado territorial da Xunta en Lugo, Javier Arias, e representantes da asociación xuvenil Xoldra, entidade organizadora do evento. Durante o encontro, abordáronse as previsións para o cartel deste ano, avaliáronse novas liñas de colaboración institucional e fíxose balance dunha edición anterior que reuniu a centos de asistentes e confirmou o potencial do festival como motor cultural e social.
Arias puxo en valor o traballo da asociación organizadora e sinalou que o BreaSon “é unha aposta clara polo talento musical galego, ofrecendo espazo aos novos creadores e reforzando, ao tempo, a actividade turística e cultural da Mariña fóra da tempada alta”.
O BreaSon volverá contar co respaldo da Xunta de Galicia, que ve nesta iniciativa unha ferramenta útil para impulsar o tecido asociativo xuvenil e dinamizar os concellos do interior. A programación completa anunciarase nas próximas semanas, mais a data xa está marcada en vermello para os amantes da música alternativa e os festivais con identidade propia.