O BNG reivindica en Foz o seu modelo municipal con vistas ás eleccións de 2027
O BNG celebrou en Foz un encontro de cargos institucionais e municipais no que puxo o foco nas eleccións de 2027 e na necesidade de estender o seu modelo de política municipal tamén na comarca da Mariña. A formación nacionalista destacou a existencia dun proxecto propio, “recoñecible e acreditado”, tanto nas responsabilidades de goberno como no labor desenvolvido desde a oposición.
Durante a reunión, os representantes do BNG fixeron fincapé nos principios que sustentan a súa acción política no ámbito local, entre os que salientaron a participación activa da veciñanza, a procura da igualdade real e da xustiza social, o reforzo dos servizos públicos e a defensa do medio natural. Tamén subliñaron a importancia da promoción da lingua e da cultura galegas como elementos esenciais da identidade do país.
Neste contexto, os nacionalistas apostaron por impulsar o desenvolvemento económico desde o propio territorio, apoiándose nos recursos locais e fortalecendo o tecido produtivo. “O noso modelo é claramente identificable fronte a outras opcións políticas, apostando sempre polo coidado do territorio, da paisaxe e do medio ambiente como bases da nosa identidade e tamén da nosa economía”, sinalou o responsable comarcal do BNG, Antonio Veiga.
Outro dos asuntos centrais abordados no encontro foi o financiamento das entidades locais e o anteproxecto da nova Lei de Administración Local de Galicia. Desde o BNG cualificaron este documento como insuficiente e afastado das necesidades reais dos concellos, ao considerar que non resolve os conflitos competenciais existentes nin aborda de maneira efectiva o problema do infrafinanciamento municipal.
Neste sentido, advertiron de que a falta de recursos económicos segue a limitar a autonomía local, impedindo aos concellos desenvolver con plenitude as súas competencias e mellorar os servizos básicos. A alcaldesa de Barreiros, Ana Ermida, manifestou que “este anteproxecto non ten en conta a realidade galega nin aposta por solucións adaptadas aos problemas actuais dos municipios”. Ademais, incidiu en que resulta imprescindible “mellorar o financiamento local para garantir servizos de calidade, xa que os concellos non contan con suficiencia financeira”.
O encontro serviu así para reforzar a estratexia municipal do BNG na comarca, cun discurso centrado na proximidade coa cidadanía, na defensa dos intereses do territorio e na necesidade de avanzar cara a un modelo de xestión máis xusto e sostible.