O BNG reclama transparencia e garantías para a continuidade de Alcoa en San Cibrao
Representantes do Bloque Nacionalista Galego (BNG) mantiveron unha reunión co comité de empresa de Alcoa para abordar a situación da planta de San Cibrao. Ante a incerteza actual, a formación nacionalista reclama ao Goberno do Estado maior transparencia e que faga público o Memorando de entendemento asinado coa empresa, ademais de desenvolver todas as actuacións necesarias para garantir a continuidade da actividade e o mantemento do emprego na Mariña.
O deputado do BNG no Congreso, Néstor Rego, denuncia a falta de transparencia sobre este acordo, que foi asinado entre a empresa, o Goberno e a Xunta, pero que nin é público nin foi dado a coñecer ao comité de empresa. “Polo que sabemos, implica non respectar os compromisos alcanzados cos traballadores, especialmente no que respecta aos investimentos pendentes, como a construción do forno de ánodos”, advertiu.
Rego criticou tamén a actitude do Ministerio de Industria, ao considerar que está a buscar unha saída que favoreza a empresa sen garantir a continuidade da actividade produtiva nin os postos de traballo. Ademais, alertou do risco de que esta situación poida derivar nun proceso de desindustrialización semellante ao xa vivido en Alcoa A Coruña e Alcoa Avilés, onde o peche definitivo das instalacións provocou graves consecuencias económicas e laborais.
“O BNG entende que existen solucións viables para garantir a subministración enerxética da planta mentres non se materializan as PPAs (Power Purchase Agreements) previstas”, afirmou o deputado. Segundo datos recentes, máis do 40% da enerxía xerada en Galicia é exportada a outras comunidades, polo que “hai enerxía suficiente dispoñible para asegurar a continuidade da actividade”.
A formación nacionalista insta o Goberno a rectificar e esixe un cambio de postura en favor dos traballadores. “Debe obrigar a Alcoa a cumprir cos compromisos adquiridos, garantindo os investimentos necesarios para a viabilidade da fábrica”, subliñou Rego. Neste sentido, o BNG propón que o Executivo explore mecanismos de financiamento, como a concesión de créditos reembolsables, para asegurar que a empresa realice os investimentos comprometidos.
Así mesmo, o BNG destaca a importancia de que calquera acordo inclúa tamén aos traballadores das empresas auxiliares, garantindo a protección do emprego ata decembro de 2026, prazo no que Alcoa asegura manter o emprego directo.
Por último, Rego lembrou que, se fose necesario, a SEPI (Sociedade Estatal de Participacións Industriais) debe estar preparada para intervir a empresa e asegurar a continuidade da actividade industrial. “Non imos permitir que se repita a situación vivida noutras plantas de Alcoa. O Goberno debe actuar con determinación e poñer por diante os intereses da industria e dos traballadores”, concluíu.