O BNG denuncia a proliferación de maleza nas beirarrúas do Valadouro
O BNG de Alfoz-Valadouro chama a atención sobre o crecemento descontrolado de herbas e maleza nas beirarrúas de distintas rúas do centro do Valadouro, como a avenida de Viveiro ou a rúa Ramón Canoura. Segundo o grupo nacionalista, trátase dunha situación que reflicte unha clara falta de mantemento dos espazos públicos por parte do goberno municipal.
Desde a formación destacan que as herbas invaden os bordos das beirarrúas, dificultando o paso e ofrecendo unha imaxe de abandono que, din, "non se corresponde cun concello que debe coidar da súa contorna urbana". Tamén lembran que esta situación pode derivar en problemas de seguridade e salubridade, especialmente nas épocas máis húmidas.
O BNG insta ao executivo local a poñer en marcha un plan de limpeza específico para o control da vexetación nas beirarrúas, garantindo así un espazo público coidado, accesible e seguro para toda a veciñanza.