O BNG denuncia a acumulación de residuos no parque das Nogueiras
O BNG alertou da preocupante volta á situación de abandono e acumulación de residuos na parcela do parque das Nogueiras, un espazo que durante máis de dúas décadas funcionou como vertedoiro incontrolado e que, durante o seu paso pola Tenencia da Alcaldía, lograron limpar e recuperar.
A portavoz da formación, Míriam Bermúdez, lembrou que, baixo o goberno do BNG na Tenencia, realizouse unha intervención clave para erradicar esta problemática, limpando por completo a zona e promovendo a xestión responsable dos residuos. "Para iso, renovamos e ampliamos o Punto Limpo de Patarroa-Escourido e elaboramos unha nova Ordenanza de Convivencia, Limpeza e Residuos", explicou.
Grazas a estas medidas, o parque das Nogueiras permaneceu libre de lixo ata o último día do seu mandato. Porén, Bermúdez denuncia que, coa chegada de Mariña Gueimunde ao goberno municipal, a situación volveu ao punto de partida. "Comezan a acumularse restos de poda, herba e outros refugallos, demostrando unha falta de xestión e compromiso dende os primeiros días", criticou.
A nacionalista lamentou que tanto PSOE como PP repitan as mesmas políticas, en contraste co traballo feito polo BNG, que conseguiu manter o espazo en bo estado. "Manter limpas as Nogueiras é posible, só fai falta vontade", concluíu.