O BNG de Viveiro, preocupado pola suspensión das medidas económicos-sociais de María Loureiro
O BNG de Viveiro ve con preocupación a decisión do Goberno municipal de deixar en suspenso a adopción de medidas económicos-sociais que axuden a minimizar o impacto negativo da crise sanitaria ata o remate de estado de alarma.
Así, con sorpresa e preocupación ven de recibir o BNG de Viveiro un escrito da alcaldía no que o Goberno municipal manifesta o rexeitamento a todas as últimas propostas que lle presentou a organización nacionalista este luns, 23 de marzo, co obxecto de entre todos buscar solucións alternativas e complementarias para facilitarlles ás empresas e familias viveirenses a maior liquidez posíbel para afrontar o futuro máis inmediato e axudar ao mantemento do tecido produtivo do municipio.
A alcaldesa trasladoulle á portavoz municipal do BNG, Miriam Bermúdez, a decisión do Goberno municipal de “deixar en suspenso a adopción de medidas económico sociais para cando remate o estado de alarma e a crise sanitaria actual o permita”, alegando erradamente que todos os grupos así o acordaran na última xuntanza de portavoces.
O BNG lamenta que, "aínda sabendo que o estado de alarma ven de ser prorrogado polo Goberno do estado durante 15 días máis, o goberno municipal acorde unilateralmente aprazar, e sen concretar data algunha no tempo, todas as decisións referentes a adopción de medidas económicas e fiscais para minimizar o impacto negativo desta crise. Un paquete de medidas que a administración local vai ter que poñer en marcha coa maior axilidade posíbel se quere contribuír ao mantemento das economías das familias viveirenses e relanzar a economía local no menor tempo posíbel para contribuir a manter a actividade empresarial e comercial no municipio", din os nacionalistas.
A portavoz municipal do BNG, non acaba de achar a causa polo cal o goberno municipal rexeita poñer en marcha de xeito inmediato medidas económicas especiais para paliar a economía das veciñanza e dos proveedores do concello que lle propuxeron os nacionalistas, tales como o de axilizar o pagamento a proveedores e priorizar a tramitación de expedentes que conleven cobro de axudas ou débedas pendentes de pago por parte do concello, sendo ademais este tipo de medidas as primeiras que adoptaron moitas administracións públicas, tales como concellos e deputacións.
Por outra banda, Miriam Bermúdez entende que "carece de toda lóxica aprazar para cando remate a crise sanitaria a proposta feita polos nacionalistas para a posta en marcha dunha Mesa de Coordinación Municipal dos ofrecementos de axuda do sector privado".
Cabe recordar que a proposta feita polo BNG da creación dunha Comisión Técnica Pública-Privada, para plantexar, estudar e propoñer as medidas de orde económico, fiscal e social fíxose tendo en conta as demandas, desde diferentes sectores produtivos, de axuda e colaboración ao Goberno municipal para frear na medida do posíbel o forte impacto económico que van sufrir os seus negocios.
Por último, os nacionalistas aseguran que seguirán a colaborar co Concello, poñendo a súa disposición e do Goberno municipal, todas aquelas propostas que consideren, nesta situación de crise sanitaria e económica, podan ser beneficiosas e axudar ao pobo de Viveiro, tanto para a veciñanza como para as empresas, autónomos e profesionais.