O BNG de Viveiro denuncia o “despilfarro” polo atraso na licitación dunha empresa de servizos enerxéticos
O BNG de Viveiro criticou no último pleno municipal o atraso na licitación dunha empresa de servizos enerxéticos, unha demora que, segundo sinalan, está a supoñer un gasto innecesario de miles de euros mensuais para o Concello.
O concelleiro nacionalista Seve Salgueiro explicou que é “incuestionable” a necesidade de romper co actual contrato de subministro eléctrico polo seu “custo desorbitado”, e lembrou que a contratación dunha empresa especializada permitiría optimizar tanto o consumo como o gasto enerxético. Salgueiro indicou que o anterior goberno do BNG deixara un informe técnico moi avanzado, co compromiso de sacar a licitación en xuño. “Quedaban aspectos por perfilar e, ao tratarse dun contrato de elevado importe, debía pasar polo Consello Consultivo”, precisou.
Porén, segundo o edil, tras a moción de censura o Executivo do PP decidiu paralizar o proceso porque, en palabras do tenente de alcalde, “non o entende” e “non lle convence”. Salgueiro afeou que, en lugar de aproveitar o traballo xa feito, optaran por “romper o proxecto, encargar outro informe valorado en 6.000 euros e alongar os prazos, perdendo miles de euros cada mes”.
Os nacionalistas denunciaron tamén que o goberno non foi capaz de cuantificar o sobrecusto que está xerando este atraso. “Non o saben, pero facilmente pode chegar ás cinco cifras”, advertiron. Para o BNG, o PP “frean calquera avance que leve o selo do anterior goberno” e actúan “pensando só no beneficio electoral, aínda que iso prexudique a Viveiro”.