O BNG de Ribadeo designa a Martín Graña como candidato á Alcaldía para 2027
O Bloque Nacionalista Galego en Ribadeo abre unha nova etapa orgánica e política tras elixir a Martín Graña como candidato á Alcaldía nas eleccións municipais previstas para 2027. A decisión foi adoptada pola militancia na asemblea celebrada na tarde do venres, nun proceso interno no que se apostou por combinar continuidade e renovación dentro do grupo municipal.
Coa designación, Graña asumirá tamén a portavocía do grupo no Concello, función que ata o de agora viña desempeñando Pablo Vizoso, quen continuará formando parte da corporación como concelleiro do Bloque Nacionalista Galego. O anuncio oficial produciuse na mañá do sábado, nun acto no que ambos escenificaron o relevo e trasladaron unha mensaxe de cohesión interna.
Vizoso explicou que o paso atrás na portavocía responde “á responsabilidade e ao compromiso coa veciñanza”, subliñando que o proxecto político “queda en boas mans na figura de Martín Graña”. O ata agora portavoz puxo o acento na necesidade de fortalecer o equipo e de preparar con tempo a cita electoral, defendendo que a organización local inicia unha fase de impulso e reorganización.
Pola súa banda, Martín Graña amosouse “ilusionado” ante o novo reto e asegurou que traballará para “construír unha alternativa forte e solvente que sitúe Ribadeo onde merece estar”. O novo candidato incidiu na importancia de ampliar a base social do proxecto nacionalista e de poñer “as persoas no centro das políticas municipais”, reivindicando unha acción pública próxima e útil.
“É unha honra asumir esta responsabilidade. Afróntoa con ilusión e coa vontade de escoitar, aprender e mellorar día a día”, afirmou, ao tempo que salientou que Ribadeo “ten un potencial enorme que debe ser reforzado con boa xestión, rigor e compromiso”. Graña foi máis alá ao marcar un horizonte claro: “Debemos construír a alternativa entre todas e todos, con esperanza e proxecto para mellorar a vida das persoas. Diso se trata a política. E xa o digo claramente: o vindeiro ano saímos a gañar; queremos volver gobernar este concello”.
No transcurso do acto tamén houbo palabras de recoñecemento ao labor desenvolvido por Vizoso á fronte da portavocía municipal. Graña agradeceu “o seu compromiso, a súa dedicación e a defensa constante dos intereses da veciñanza de Ribadeo”, asegurando que a etapa anterior deixa “unha base sólida” sobre a que seguir avanzando.
O BNG local inicia así un novo ciclo no que mestura experiencia institucional e renovación xeracional, coa vista posta en consolidar unha proposta política “preparada, ilusionante e capaz de liderar o Concello desde a proximidade, a transparencia e o compromiso coa xente”.