O BNG de Ribadeo denuncia a perda da subvención para a reforma da rúa Reinante
O Bloque Nacionalista Galego de Ribadeo advertiu da perda da subvención prevista para a mellora da rúa Reinante. O portavoz municipal, Pablo Vizoso, lembrou que a comezos de abril o Concello anunciara o inicio das obras de acondicionamento en virtude dun convenio asinado polo anterior executivo do BNG, mais “chegados a mediados de setembro seguimos sen noticias da súa execución”.
Segundo explicou Vizoso, o prazo inicial de dous meses e medio xa rematara hai tempo: “Van máis de cinco meses e a realidade é que non se fixo nada”. O edil indicou que estas actuacións estaban incluídas no convenio do ARI, acordado coa Consellería de Vivenda e co Ministerio de Axenda Urbana a través do Plan Estatal de Vivenda de 2021.
O compromiso establecía que as obras de urbanización debían levarse a cabo unha vez que os propietarios particulares realizasen tamén as melloras subvencionadas. A data límite fixárase no 1 de abril, aínda que posteriormente fora ampliada até o 30 de xuño.
Vizoso sinalou que a consecuencia foi clara: “O Concello perdeu a achega de 36.000 euros do Ministerio e viuse obrigado a renunciar ás obras, por non poder xestionalas nin cubrir a parte económica que lle correspondía. Esta é a proba da desastrosa situación financeira á que nos levou o actual goberno do PP”.
O portavoz concluíu con dureza: “O resultado é evidente: nin obras, nin cartos, e unha vez máis a veciñanza de Ribadeo queda sen unha mellora necesaria”.