O BNG de Ribadeo critica a inacción do goberno local ante o deterioro das pistas multideporte
O BNG de Ribadeo volve sinalar a incapacidade do goberno municipal para solucionar os problemas das pistas multideporte, que seguen sen as melloras prometidas. As redes continúan caídas, as luces permanecen apagadas e os compromisos do concelleiro de Deportes, segundo a formación nacionalista, non se cumpriron. O edil asegurara inicialmente que as reparacións estarían listas a finais de febreiro, logo pospúxose a finais de marzo, e agora, xa en abril, as deficiencias persisten. Desde o BNG esixen máis axilidade para que a mocidade de Ribadeo poida desfrutar destas instalacións durante o maior tempo posible.
O concelleiro do BNG, Martín Graña, lamentou a falta de actuacións concretas por parte do goberno local: “As mentiras diarias do goberno municipal non cesan. A comezos de febreiro denunciamos o estado lamentable das pistas multideporte: redes caídas, unha canastra sen recolocar e luces sen funcionar. Desde o goberno municipal responderon rapidamente asegurando que os arranxos estarían listos en tres ou catro semanas. Cando ese prazo expirou, prometeron que estaría todo solucionado a finais de marzo. Agora xa estamos en abril e o único que fixeron foi recolocar unha canastra que levaban meses gardando nun almacén municipal”.
Graña insistiu na necesidade de que o goberno local actúe con maior dilixencia: “Parece que lles resulta máis doado lanzar notas de prensa que solucionar os problemas dos ribadenses. O prazo pasou e seguen sen dar resposta sobre unhas instalacións que a xuventude emprega de maneira masiva. Seguiremos denunciando esta situación cantas veces sexa necesario ata que se poña remedio. Recomendámoslles que deixen de preocuparse tanto por responder á oposición e se centren no realmente importante: solucionar os problemas da veciñanza, que para iso recibiron a súa confianza”.