O BNG de Mondoñedo impulsa novas medidas para revitalizar o comercio local
O pleno municipal de Mondoñedo aprobou por unanimidade unha moción presentada polo grupo municipal do BNG na que se insta ao goberno local a poñer en marcha novas medidas para revitalizar o comercio local. Entre as propostas destaca a reactivación da Asociación de Comerciantes e Autónomos de Mondoñedo (ACIAM), unha entidade que, segundo os nacionalistas, xoga un papel clave na dinamización do sector pero que na actualidade carece de actividade.
O voceiro do BNG, Eloi Cabanas, subliñou a importancia de adoptar medidas que garantan a supervivencia e o crecemento do comercio de proximidade. "Se queremos un Mondoñedo vivo, con oportunidades e futuro, debemos apoiar o comercio local, promovendo accións que fomenten o consumo de produtos da zona e favorezan a creación de emprego", sinalou.
A formación nacionalista tamén propón a elaboración dun censo de produtores locais e a creación dunha comisión de traballo integrada por representantes de todos os grupos municipais, comerciantes, produtores e feirantes. O obxectivo sería debater e desenvolver propostas que axuden a frear a perda de negocios na localidade e a fortalecer a competitividade do sector.
O BNG lamenta que actividades que tiveron gran acollida entre a veciñanza, como os sorteos de vales de compra no Nadal, os mercados tradicionais ou os concursos gastronómicos, teñan caído no esquecemento pola inactividade da ACIAM. Por iso, fan un chamamento ao goberno local para que impulse a súa recuperación e fomente a colaboración entre administración e empresarios. "Non podemos permitir que iniciativas que funcionaban ben se perdan por falta de apoio institucional", concluíu Cabanas.