O BNG critica o despilfarro do Concello de Ribadeo no alugueiro do camión do lixo
O BNG de Ribadeo volveu poñer o foco na xestión económica do goberno municipal, criticando o gasto continuado en aluguer dun camión do lixo que, segundo apuntan, podería ser xa propiedade do Concello.
Segundo o voceiro do grupo, Pablo Vizoso, “pasan os meses e o Concello segue tirando os cartos no alugueiro do camión do lixo. Tomando como referencia o pagado desde setembro de 2023, prazo no que vencía o contrato inicial de seis meses, sobrarían cartos para ter o camión adquirido en propiedade. Até este momento lévanse tirado 108.000 € que xa podían estar investidos para o ben de todas e todos os veciños”.
Vizoso explicou que cada mes destínanse 4.500 € ao alugueiro do vehículo, diñeiro que podería destinarse a outras necesidades do municipio. Ademais, a falta de investimento en propiedade impide ao Concello acceder a certas axudas, un agravante para a xestión local. “Cada vez sáenos máis caro. É un exemplo máis da nefasta xestión do alcalde de Ribadeo”, subliñou o voceiro do BNG.