O BNG activa en Ribadeo a preparación das eleccións municipais de 2027 na Mariña
A dirección comarcal do BNG mantivo en Ribadeo unha reunión de traballo coa que deu o pistoleiro de saída á preparación do ciclo electoral municipal de 2027 na Mariña. O encontro serviu para realizar unha análise minuciosa da realidade de cada concello e para comezar a definir as propostas que a organización nacionalista trasladará á veciñanza ao longo dos vindeiros anos.
Antonio Veiga, responsable comarcal, explicou que o BNG chega a esta fase “nun momento de crecemento sostido en todos os procesos electorais” e cun diagnóstico común sobre os problemas que afectan á comarca. “A falta de vivenda, a precariedade laboral, as carencias en infraestruturas e as dificultades no acceso á sanidade son cuestións que se repiten en todos os municipios”, indicou. Nesa liña, destacou que os gobernos locais do BNG “teñen demostrado ser motores de transformación, promovendo políticas que dinamizan a economía, favorecen o emprego e aproveitan os recursos de maneira sustentable”.
Veiga subliñou que contar con máis alcaldías nacionalistas “repercute directamente no avance do conxunto da Mariña”, ao apostar por modelos de xestión que poñen no centro o desenvolvemento económico e social de proximidade.
Durante a xuntanza, os nacionalistas tamén analizaron o que consideran unha situación de “asfixia” por parte da Xunta. Criticaron ao Partido Popular por exercer “un sectarismo evidente cos concellos que non son da súa cor política” e por cargar sobre os municipios competencias que non lles corresponden, especialmente en materia de benestar social. “É unha dinámica que cómpre frear, e o BNG está a facelo tanto desde os gobernos municipais como no Parlamento”, sinalaron.
A organización anunciou ademais que iniciará unha rolda de reunións en cada concello da Mariña, nas que participarán edís e colectivos sociais, para artellar unha alternativa nacionalista ampla, sólida e con propostas concretas que permitan avanzar á comarca “paso a paso, concello a concello”.